Агар «Шеффилд» ўйинларини кузатмасангиз, Дэвид МакГолдрик исми сизга нотаниш, чунки у ҳеч қачон ўз исмини таблога ёздирмаганди. АПЛ ўйинларида.

33 ёшли футболчи ниҳоят юқори дивизиондаги илк голларини урди - «Челси» дарвозасига дубл қайд этди.

Эътиборли томони, МакГолдрик ушбу мавсумнинг энг омадсиз ҳужумчиси сифатида мемлар қаҳрамонига айланганди. Статистика бу фикрларни асослайди.

Гап шундаки, Англияда футболчилар эга бўлган қулай вазиятларнинг даражасига қараб, xG ҳисоблаб борилади, яъни ҳужумчи аслида нечта гол уриш керак эди-ю, амалда қай даражада фойдаланди? Бу ҳам керакли маълумот.

Масалан, ушбу коеффицент бўйича, «МЮ» ҳужумчиси Мейсон Гринвуд етакчилик қилмоқда. АПЛ ўйинларида 9 гол урган ҳужумчи эга бўлган вазиятлар йиғиндиси атиги 3 голга тортади холос. Демак у жуда кўп голларни у қадар қулай бўлмаган нуқталардан урган.

Бу жадвалнинг антирекордчиси эса, айнан Дэвид МакГолдрик саналади. У ушбу мавсумда шу даражада кўп вазиятларга эга бўлганки, xG йиғиндиси 7 дан ошиб кетганди. Янаям тушунарли бўлиш учун таққос - пенальтилар xG бўйича максимум 0,8xG га баҳоланиши эътиборга олсак, МакГолдрик бу йил 10 та пенальти тепгандек вазиятларга эга бўлган. Аммо бирорта ҳам гол ура олмаганди.

Аслида Дэвид у қадар ёмон ҳужумчи эмас, масалан, ўтган мавсумда, Чемпионшипда 15 гол уришга муваффақ бўлганди. Омад келмаса, шунақа экан.

Қаҳрамон Асланов.