Agar «Sheffild» o‘yinlarini kuzatmasangiz, Devid MakGoldrik ismi sizga notanish, chunki u hech qachon o‘z ismini tabloga yozdirmagandi. APL o‘yinlarida.

33 yoshli futbolchi nihoyat yuqori diviziondagi ilk gollarini urdi - «Chelsi» darvozasiga dubl qayd etdi.

E’tiborli tomoni, MakGoldrik ushbu mavsumning eng omadsiz hujumchisi sifatida memlar qahramoniga aylangandi. Statistika bu fikrlarni asoslaydi.

Gap shundaki, Angliyada futbolchilar ega bo‘lgan qulay vaziyatlarning darajasiga qarab, xG hisoblab boriladi, ya’ni hujumchi aslida nechta gol urish kerak edi-yu, amalda qay darajada foydalandi? Bu ham kerakli ma’lumot.

Masalan, ushbu koyeffisent bo‘yicha, «MYU» hujumchisi Meyson Grinvud yetakchilik qilmoqda. APL o‘yinlarida 9 gol urgan hujumchi ega bo‘lgan vaziyatlar yig‘indisi atigi 3 golga tortadi xolos. Demak u juda ko‘p gollarni u qadar qulay bo‘lmagan nuqtalardan urgan.

Bu jadvalning antirekordchisi esa, aynan Devid MakGoldrik sanaladi. U ushbu mavsumda shu darajada ko‘p vaziyatlarga ega bo‘lganki, xG yig‘indisi 7 dan oshib ketgandi. Yanayam tushunarli bo‘lish uchun taqqos - penaltilar xG bo‘yicha maksimum 0,8xG ga baholanishi e’tiborga olsak, MakGoldrik bu yil 10 ta penalti tepgandek vaziyatlarga ega bo‘lgan. Ammo birorta ham gol ura olmagandi.

Aslida Devid u qadar yomon hujumchi emas, masalan, o‘tgan mavsumda, Chempionshipda 15 gol urishga muvaffaq bo‘lgandi. Omad kelmasa, shunaqa ekan.

Qahramon Aslanov.