Халқаро футбол ассоциациялари федерацияси (ФИФА) бугун дунё терма жамоаларининг сентябрь ойидаги рейтинг жадвалини эълон қилди. Сентябрь ойида бир нечта терма жамоалар ўртоқлик ўйинлари, Европа жамоалари эса Миллатлар лигаси доирасидаги учрашувларда иштирок этишгани боис, рейтингда ўзгаришлар кузатилди.

Ўзбекистон терма жамоаси Тожикистонга қарши ўртоқлик ўйинида ғалаба қозониши натижасида ўз ҳисобидаги баллар сонини 4тага оширди, аммо аввалги рейтингларда бўлгани каби 85-поғонани сақлаб қолди. Жамоамиз Осиё қитъасида 12-ўринни эгаллаб турибди. Қитъамизда Япония (28-ўрин), Эрон (30), Жанубий Корея (39), Австралия (41), Қатар (55) ва Саудия Арабистони (66), Ироқ (70), БАА (71), Хитой (76), Сурия (79) ва Уммон (82) терма жамоалари биздан юқори поғоналарни банд этишган.

Умумий рейтингни ҳам Бельгия терма жамоаси бошқариб турибди. Франция ва Бразилия кучли учликка, Англия ва Португалия термалари эса кучли бешликка киришган. Уругвай, Испания, Хорватия, Аргентина ва Колумбия термалари топ-10га киришган.

ФИФА рейтинги (топ-10):

1. Бельгия (1773 очко)
2. Франция (1744)
3. Бразилия (1712)
4. Англия (1664)
5. Португалия (1653)
6. Уругвай (1645)
7. Испания (1642)
8. Хорватия (1628)
9. Аргентина (1623)
10. Колумбия (1622)

Осиё мамлакатлари рейтинги:

28. Япония (1500)
33. Эрон (1489)
40. Жанубий Корея (1464)
42. Австралия (1457)
55. Қатар (1396)
67. Саудия Арабистони (1351)
70. Ироқ (1344)
71. Бирлашган Араб Амирликлар (1334)
76. Хитой (1323)
79. Сурия (1314)
82. Уммон (1303)
85. Ўзбекистон (1290)