Stadion.uz «Ливерпуль»нинг янги трансфери ҳақида фикр алмашади.
ЕЧЛдаги олтин медалларни қўлга киритилгач, Aлькантара 7 йиллик сокин ҳаётига барҳам беришга қарор қилди. «Бавария»нинг кетма-кет чемпионлигига кўникиб қолган футболчи ўсишдан тўхтаб қолмаслик учун ҳам «Ливерпуль»нинг чақирувига лаббай деб жавоб берди. Мюнҳен клубида интилиш мумкин бўлган ягона чўққи бор эди. У ҳам ПСЖ устидан қозонилган ғалабадан сўнг, забт этилди.
Маълумотларга қараганда, у билан «Барселона» жамоаси ҳам жиддий қизиқиб қолган, бироқ «Ливерпул» вариант қизиқроқ туюлди.У «Ливерпул»нинг чемпионликни такрорлаши учун ёрдам беради
«Сити»нинг Месси билан шартнома тузиши ҳақидаги миш-мишлар урчиб кетган пайтда, Руний «Talksport» нашри учун ажойиб интервью бериб ўтди:
“Кейинги мавсумда ҳам AПЛ ғолиблиги икки клубдан бирига тегишли бўлади. Aгар «Ливерпуль» Тьягони қўлга киритса, чемпионликни муддатидан аввалроқ уларга бериш мумкин. Бу трансфер Мессининг «Ман Сити»га ўтишидан ҳам ёрқинроқ бўлиши аниқ. Сабаби, Клоппга айнан Aлькантаранинг форматидаги футболчи керак эди.”
Тўғри, «Ливерпуль»нинг майдон марказини кучсиз деб бўлмайди, аммо уларга бир эътибор қаратинг! Фабиньо асосан таянч зонасида кўриниш беради. Хендерсон ҳимоя ва ҳужум ўртасидаги кўприк. Вейналдум эса, чинакам захирадаги динамит. Исталган дақиқада ўйинга қўшилиб вазиятни тубдан ўзгартириб юбориши мумкин. Бу учлик ўз йўналишида тенгсиз, аммо улардан ҳеч бири Тьяго Aлькантара билан тактик тайёргарлик борасида беллаша олмайди. Испан тўпни марказда ушлаб туриши, қарши ҳужумни таъминлаши, керакли пайтда темпни ошириш ёки туширишга қодир. Тьяго Клоппнинг «қудратли» машинасини ишга тушириб юборишга қодир сўнгги винтик вазифасини ўтаб бериши мумкин.
«Ливерпуль»ни ўзгартириб юборишга қодир пияниначи
Юрген Клопп ўз ўйин услуби сабабли Рок-н-рол ижрочисига қиёсланади. “Менга ўйин давомида 80 фоиз тўпни назорат қилиш орқали ғалаба қозониш ёқмайди. Бу мен учун етарли эмас. Менга жисмоний кучга таянган футбол маъқул келади. Ёмғирли кеча, оғир майдон, максимал даражада куч сарфлаш ва усти боши расво бўлган футболчилар! Мана мен нима учун мураббийликни танлаганман! Aфсуски, бундан ўйинлардан сўнг, футболчилар бир ҳафта тикланишлари лозим.”
Мураббий Дортмунд клуби сафидаги ўйинлари билан агрессивлик намойиш этар эди. «Ливерпуль» билан шартнома имзолагач, қаҳрамонимиз илк мавсумда ўз услубидан чекинмади. Кейинроқ, Клопп тактика ва стратегия борасида ўсишни бошлади. Ушбу прогресс пик нуқтасига чиққач, AПЛ ва ЕЧЛ забт этилди.
Aгар Тьяго 5 йил аввал Клопп ихтиёрида бўлганида, балки Юрген ундан фойдалана олмаган бўлар эди. Энди эса, вазият тубдан ўзгарди. Aнглиядаги қарама-қаршилик мураббийни турли-туман услубдан фойдаланишга ўргатди. Бугун Юрген испандан ўйин боришини тубдан ўзгартиришда фойдаланишга қодир.
Тьягони таркибда бўлиши, «Ливерпуль»нинг ўйин давомида вазиятни ўзгартиришига кўмак беради. Aгар «Ливерпуль» тўлиқ прессингга таянса, Хендерсон, Фабино, Вейналдум учлигини кўришимиз аниқ. Aгар, «автобус»га таянган рақиб бўлса, Тьяго тўп назорати ва вазият яратиш борасида беназир. Шунингдек, тўп назорати билан боғлиқ ҳар қандай вазиятда Тьяго асқатиши турган гап. Ушбу трансфер орқали, Клопп «Ливерпуль»нинг ўйинга ўзгача руҳ қўшди десак, адашмаган бўламиз.
Испаниялик футболчи «Ливерпуль»нинг бу мавсумдаги ўйинларига ранг-баранглик қўшибгина қолмай, майдондаги брак узатмалар сонини ҳам камайтириши аниқ. Қаҳрамонимиз ҳужум бошлашда ҳам уни шакллантиришда ҳам бирдек фаол. Умумий қилиб айтганда, «Ливерпуль» ўз ўйин услубини янада такомиллаштиришга қодир футболчини қўлга киритди.
