Тошкентнинг «Пахтакор» жамоаси ҳужумчиси Драган Черан Осиё Чемпионлар лигаси ва жамоанинг тайёргарлик жараёни ҳақида фикр билдириб ўтди.
- Салом Драган. «Истиқлол» кучли клуб эди. Шу сабабли, уларга алоҳида тактикадан фойдаланилдими? Бирор бир олдиндан ўйлаган режа бор эдими?
- Очиғи, ҳеч қандай олдиндан ўйланган режа йўқ эди. Биз мусобақадаги барча учрашувларда ўз услубимизда тўп суряпмиз. Рақибнинг ким бўлиши муҳим эмас. Aсосийси ўз услубимиз билан натижа кўрсатиш.
- Шота Aрвеладзенинг аҳволи қандай?
- Унинг аҳволи анча яхши. Касаллик енгил ўтмоқда. Тез орада сафимизга қайтади деган умиддаман.
- «Истиқлол» билан ўйиндан сўнг, жамоанинг руҳий ҳолати қандай?
- Жуда ажойиб кайфиятдамиз. Йигитлар жуда хурсанд. Барчамиз, катта йўлни босиб ўтганимизни ҳис этяпмиз. Энди яна олдинга қадам ташлашимиз лозим. Aсосийси, йигитлар ўртасида ҳурмат мавжуд. Шу омил сабабли аҳилликни ушлаб турибмиз.
- Шота Aрвеладзенинг йўқлиги жамоани қийин аҳволда қолдирмадими?
- Менимча йўқ. Сабаби, деярли ҳар куни у билан телефон орқали суҳбатлашяпмиз. Унинг ёрдамчилари Шотанинг кўрсатмаларини бизга етказиб турибди.
- Нима учун «Пахтакор»да вазиятлардан фойдаланиш бироз оқсамоқда?
- Вазиятлардан фойдаланиш борасида оқсаяпмиз дея олмайман. Шунчаки, омад келмаяпти холос. Шунга қарамай, керак паллада гол киритишни уддалаяпмиз. Бундай учрашувларда биргина гол ўйин тақдирини ҳал қилиши мумкин.
- Мусобақанинг бундай форматда ўтказилиши ноқулай эмасми? Мусобақа Тошкентда давом эттирилганда жамоанинг имкониятлари ошган бўлар эдими?
- Ўйлашимча вазият ҳамма учун тенг. Биз айнан шундай форматдаги мусобақага тайёргарлик кўрганмиз. Шу сабабли, формат борасида муаммо йўқ. Тошкентда тўп тепганимизда албатта яхшироқ бўлар эди, аммо бунинг имкони йўқ.
Яҳёхўжа Улуғхўжаев суҳбатлашди
