«Ливерпуль» ҳимоячиси Виржил ван Дейк ўнг оёқ тизза қисмидан олган жароҳати туфайли операция қилинади. Бу ҳақда клуб матбуот хизматида хабар берилди.

Ливерпулдагилар ҳозирча 29 ёшли нидерландиялик футболчининг тикланиш вақти ҳақида маълумот бермаган. Жароҳат жиддий эканлигини ҳисобга олиб, ван Дейк мавсумнинг қолган қисмини ўтказиб юбориш эҳтимоли ҳам катталиги айтилмоқда.

Эслатиб ўтамиз, Виржил Англия чемпионатининг 5-тури доирасида ўтказилган «Эвертон»га қарши баҳснинг (2:2) 11-дақиқасида рақиб посбони Жордан Пикфорд билан тўқнашиб кетган ҳолда жароҳат олган ва шундан сўнг алмаштирилганди.

Маълумот учун, «Ливерпуль» Виржил ван Дейкни 2018 йил январида 84,5 миллион евро эвазига «Саутгемптон» клубидан сотиб олганди. Нидерландиялик футболчи Мерсисайд клуби сафида ҳозирга қадар 90 та ўйинда қатнашиб, 9 та гол уришга эришди.