Бугун бўлиб ўтаётган UFC-257 доирасида ўзбекистонлик жангчи Маҳмуд Муродов бугун ўзининг учинчи жангини ўтказди. Ҳамюртимизга америкалик Эндрю Санчес рақиблик қилди.

Маҳмуд дастлабки раундни фаол ўтказди ва рақибга турли услубларда зарба йўллашга ҳаракат қилди. Натижа у бу бўлимни ўз фойдасига ҳал қилди.

Санчес эса иккинчи бўлимда вазиятни ўзгартиришга, ташаббусни ўз қўлига олишга интилди. Муродов раунд сўнгида рақибга ўз зарбасини ўтказа олди. Фақат ишни ғалабага етказиш учун унга вақт етмай қолди.

Учинчи бўлим ўрталарида эса ҳамюртимиз кросс зарба билан рақибни қийин аҳволга солиб қўйди. Кетидан эса у рақиб юзига тизза зарбасини йўллади. Маҳмуд кетма-кет зарба йўллаётганида рефери жангни тўхтатди.

Шу тариқа, Маҳмуд Муродов UFCдаги учинчи жангида учинчи ғалабани қўлга киритди.