Bugun bo‘lib o‘tayotgan UFC-257 doirasida o‘zbekistonlik jangchi Mahmud Murodov bugun o‘zining uchinchi jangini o‘tkazdi. Hamyurtimizga amerikalik Endryu Sanches raqiblik qildi.

Mahmud dastlabki raundni faol o‘tkazdi va raqibga turli uslublarda zarba yo‘llashga harakat qildi. Natija u bu bo‘limni o‘z foydasiga hal qildi.

Sanches esa ikkinchi bo‘limda vaziyatni o‘zgartirishga, tashabbusni o‘z qo‘liga olishga intildi. Murodov raund so‘ngida raqibga o‘z zarbasini o‘tkaza oldi. Faqat ishni g‘alabaga yetkazish uchun unga vaqt yetmay qoldi.

Uchinchi bo‘lim o‘rtalarida esa hamyurtimiz kross zarba bilan raqibni qiyin ahvolga solib qo‘ydi. Ketidan esa u raqib yuziga tizza zarbasini yo‘lladi. Mahmud ketma-ket zarba yo‘llayotganida referi jangni to‘xtatdi.

Shu tariqa, Mahmud Murodov UFCdagi uchinchi jangida uchinchi g‘alabani qo‘lga kiritdi.