Озарбойжон чемпионатида тўпурарлик қилаётган Ўзбекистон миллий терма жамоаси ҳужумчиси Баҳодир Насимов айни дамда уйи Самарқандда дам олмоқда. Футболчининг айтишича, ҳозирда унинг олдида бир қатор клублардан таклифлар мавжуд.
"Россия ва Туркия клубларидан таклифлар бор. Яқинда клубимиз президенти менга Туркия суперлигасининг 2-3 клубидан таклифлар тушганлигини айтди. Иккинчи давра тайёргарлигини Туркияда ўтказамиз. "Нефтчи" президенти қизиқаётган клублар ўша ерда мени кузатишларини маълум қилди. Бироқ, ҳозирча "Нефтчи" билан амалда шартномам борлиги боис ҳеч қайси клуб билан алоқага чиққаним йўқ", деди Баҳодир Насимов "Эрудит Спорт" газетасига берган интервьюсида.
Эслатиб ўтамиз, Озарбойжон чемпионатининг биринчи давраси якунига кўра Бокунинг "Нефтчи" клуби карвонбошчилик қилмоқда. Баҳодир Насимовнинг ўзи тўпурарлар баҳсида 11 гол билан пешқадам бўлиб турибди.
