"Рома" жамоа ярим ҳимоячиси Даниэле Де Росси билан амалдаги шартномани узайтириш бўйича ҳали ҳам бир тўхтамга кела олгани йўқ. Бу ҳақда клуб директорларидан бири Жеймс Паллотта маълум қилган.
"Бу масалада ҳеч қандай молиявий муаммолар йўқ. Биз футболчининг шартномасини узайтириш устида иш олиб бораяпмиз, аммо ҳозирча ҳеч қандай янгилик йўқ", дея Паллоттанинг сўзларидан "Football Italia" нашри иқтибос келтирмоқда.
Нашр маълумотларига кўра, клуб футболчига шартноманинг якуний кўринишини таклиф қилган. Янги шартномага кўра, футболчи йилига олти миллион евро маош олади, шунингдек, қўшимча бонуслар ҳам кўзда тутилган. Шартнома беш йил муддатга тузилади. Ярим ҳимоячи ва унинг агенти таклиф қилинган шартларни ўйлаб чиқиш учун вақт сўрашган.
Агар Де Росси ушбу шартномани имзолашдан бош тортса, қишки трансфер ойнаси вақтидаёқ бошқа жамоага сотиб юборилади. Италиялик футболчига даъвогар жамоалар қаторида "Манчестер Сити", "Манчестер Юнайтед", "Реал" ва "Интер" кабиларнинг номлари бор.
Эслатиб ўтамиз, Де Россининг "Рома" билан амалдаги шартномаси шу йилнинг ёзида якунига етади ва у ҳозирдан бошқа жамоалар билан музокара олиб бориши мумкин. Аввалроқ, футболчининг агенти икки томон шартнома масаласида келишувга эриша олишини айтиб ўтганди.
