"Интер" бош мураббийи Клаудио Раньери "Парма"га қарши Италия чемпионати 17-тур учрашувидан кейин ўз хурсандчилигини яшириб ўтиргани йўқ.
"Интер" - "Парма" учрашуви 5:0 ҳисобида миланликлар фойдасига ҳал бўлди. Учрашувда Диего Милито дублга эришган бўлса, Мотта, Паццини ва Фараонилар битта голни ўз ҳисобларига ёзиб қўйишди. Ушбу муваффақият жамоанинг сўнгги олти ўйиндаги бешинчи ғалабаси бўлди.
"Бошида бизнинг кўрсаткичларимиз даҳшатли даражада ёмон эди, аммо кейин статистика бизга кулиб боқди. Шогирдларим чемпионлик пойгасига қайтишга тайёр эканликларини кўриб турибсиз. Чемпионатни қайси ўринда якунлаймиз? Мен буни билмайман, бунга фақатгина майдонда қайд этиладиган натижалар жавоб бера олиши мумкин, холос", деди италиялик мутахассис.
"Бугунги баҳс мен жамоа бош мураббий этиб тайинланганимдан кейинги энг яхши ўйин бўлди, деб ўйлайман. Биз бор эътиборимизни ўйинга қаратгандик ва охиригача уни назорат қилиб турдик. Биз "Милан"га қарши ўйинга яхши бир формада етиб келаяпмиз, футболчиларимиз "батарейкаларни қайта қувватлантириб олишга" муваффақ бўлишди. Умид қиламанки, Форлан ва Снейдер "Милан"га қарши ўйингача тикланиб улгуришади. Агар шундай бўлса, у ҳолда ушбу икки футболчи 2012 йилдаги энг яхши харидларимиз бўлишади", дея "Интер" бош мураббийи Клаудио Раньерининг сўзларидан иқтибос келтирмоқда "Football Italia" интернет-нашри.
Айни вақтда "Интер" Италия А Сериясида 17 учрашувдан сўнг 20 очко тўплагани ҳолда 5-ўринни эгаллаб турибди. "Милан"га қарши учрашув 15 январь, якшанба куни бўлиб ўтади.
