"Актобе"нинг янги ҳужумчиси Игорь Сергеев клуб матбуот хизматига биринчи интервьюсини берди. Ўзбекистон терма жамоаси нима учун ушбу жамоани танлаганига изоҳ бериб ўтди.

— Игорь, "Актобе"га хуш келибсиз! Ўз ҳиссиёт ва фикрларингиз билан ўртоқлашсангиз. Нима учун бизнинг жамоани танладингиз?

— Ҳиссиётлар фақат ижобий. Бу ерда эканимдан хурсандман. "Актобе" ҳақида фақат яхши гаплар эшитдим. Бу ерда жипслашган жамоа йиғилганини билардим. Коллектив жуда аҳил ва иноқ. Бу жамоага қандай қўшилдим? Агент менга бир нечта вариантларни таклиф қилди. Улар орасида Қозоғистон клублари ҳам бор эди. Сабабини билмадиму, қалбимга "Актобе" ўтирди. Шунинг учун бу жамоани танладим.

— Бу ҳақда кўп ўйладингизми? Ким билан маслаҳатлашдингиз? Якуний қарор қабул қилишда ким ёрдам берди?

— Яширмайман, жуда кўп ўйладим. Жуда ҳам кўп. Салбий ва ижобий томонларини тош-тарозуга солдим. Ўйлаб ўтирмасдан дарҳол қабул қилишга ўрганмаганман. Ҳамиша ўз агентим билан маслаҳатлашаман. Ўйлаймиз. Александр Гейнрих ва Тимур Кападзе билан маслаҳатлашдим. Ватандошларим бу ерда бир неча йил тўп тепишган. Улар "Актобе", шаҳар ва мухлислар ҳақида яхши фикрлар айтишди. Такрорлайман, негалигини билмадим, аммо мен "Актобе"ни танладим. Бор гап шу.

— Жамоа Алексей Бага бошқараётгани муҳим омил бўлдими? Мураббий жамоани қандай услубда ўйнатаётганига эътибор қаратдингизми? Услуб сизга маъқулми?

— Ҳа, бу жуда муҳим. Шубҳасиз, қайси жамоага, қандай мураббий қўлостида ўйнашга йўл олаётганим мен учун муҳим. У ёш ва истиқболли мутахассис. Қаерда ишламасин, ўша жамоани чемпионга айлантирган. Буларнинг барчаси қарор қабул қилишимда муҳим роль ўйнади. У билан юзма-юз гаплашиб олиш муҳим аҳамиятга эга бўлди. У менда яхши таассурот қолдирди.

Алексей Анатольевич ақлли мураббий, нимани хоҳлаётганини, мақсадга қандай эришиш мумкинлигини яхши билади. Энг камида тўғри фикрламоқда. Аниқ режа ва стратегияга эга. Бу муҳим. Кўп мураббийлар нималарнидир гапирадию, аммо амалда бошқа иш қилади. Бага эса ундай эмас. У берган саволларимнинг барчасига жавоб берди. Бу эса менинг қароримга таъсир кўрсатди.

Унинг футболи борасида шуни айтишим мумкинки, ҳа мен БАТЭ ва "Жальгирис" иштирокидаги ўйинларни кўрдим. Умуман олганда, унинг ўйини менга тўғри келади. Қолганини эса кўрамиз...

Эслатиб ўтамиз, Сергеев — "Пахтакор"нинг Ўзбекистон чемпионатларидаги энг яхши тўпурари ҳисобланади. Ўтган мавсумда у "шерлар" сафида 24та ўйинда майдонга тушиб, 16та гол муаллифига айланди. Унга "Астана" ҳам қизиқиш билдирганди.