Душанбадан сешанбага ўтар кечаси ФИФАнинг гала-концертида камтар аргентиналик футболчи Лионель Мессига учинчи бор кетма-кет дунёнинг энг нуфузли соврини — "Олтин тўп" тақдим этилди. Мукофотни қўлга киритиб бўлиб, барча ҳаяжонлари босилгач, у биринчи бўлиб FIFA.comга интервью берди.
- Сиз Мишель Платинидан сўнг "Олтин тўп" совринини кетма-кет уч бор ютиб олган илк футболчи бўлдингиз. Кечинмаларингиз қанақа?
- Мен совринни уч бор, айниқса кетма-кет ютаётганимдан жуда фахрланаман. Бу нуфузли совриннинг биттасини ютиш жуда қийин, учтасини эса гапирмаса ҳам бўлади. Мен жуда хурсандман, бу соврин худди биринчиси сингари менга хушвақтлик бахш этмоқда.
- Сиз ушбу совринни Хавига бағишлаганингизни айтиб ўтдингиз. Нима деб ўйлайсиз, агар у сизга тўп узатишдан бироз чекланcа ўзи ҳам "Олтин тўп" ютиши мумкинми?
- Йўқ! У менга буни кўп марта айтган, у мен ҳақимда қайғуради, мен ҳам худди шундайман. Биз бир-биримизга керакмиз ва дўстлигимиз ҳар қандай мукофот ёки соврин доирасини тарк этади.
- Ҳали ёшсиз. Балким биз Мессининг энг кучга тўлган пайтларини кўраётгандирмиз ёки бу ҳали ҳаммаси эмасми?
- Умид қиламанки, жамоам учун совринлар ютиш миссиямни ҳали давом эттираман. Ҳозирги ўйинимни асло пасайтирмаган ҳолда миллий терма жамоам сафида ҳам нималаргадир эришмоқчиман.
- Нима деб ўйлайсиз, Аргентина билан ҳам ниманидир исбот қилиб бера оласизми?
- Ҳа. Мен терма жамоам билан қандайдир ютуққа юришишни жуда хоҳлайман ва ишонаманки, ўша кун келади.
- Қайси жиҳатингизни ҳали яхшилашингиз учун йўл бор деб ўйлайсиз?
- Юқорида айтганимдек, шунчаки ҳали кўп туп сурмоқчиман. Бу Гала-концертга бешинчи ташрифим, бу ерга ҳали жуда кўп марта келмоқчиман.
- Сиз қисқа вақт мобайнида шунчалик кўп ютуқларга эришаман деб ўйлаганмидингиз?
- Ростини тан олсам, бунақа фикр хаёлимга ҳам келмаган. Мен олий дивизионда ўйнаш орзусида бўлгандирман, лекин бу мукофотлар тушимга ҳам кирмаганди.
- Болалигингизда сиз ҳайрат билан ўйинларини томоша қилган буюк футболчилар билан бир оқшомда, боз устига уларнинг ҳам диққат марказида бўлишдан қандай ҳиссётлар туяяпсиз?
- (Қизариб) Йўқ, мен шунчаки футбол ўйнаб, спортнинг бу туридан лаззат олишни ўйлайман холос. Умид қиламанки, эришган натижаларимизни муносиб ҳимоя қиламиз.
- 2012 йилдаги мақсадларингиз нималардан иборат?
- Худди бир йил аввалгидек: натижаларимизни яна ва яна такрорлаш. Гарчи бу иш борган сари қийин бўлиб бораётган бўлса-да...
