Хабарингиз бор, Coca Cola Суперлига – 2021 баҳслари 9 март куни старт олади ва “Навбаҳор” шу куни ўз майдонида Жиззахнинг “Сўғдиёна” клубини қабул қилади.

Жамоа уй учрашувларини ўтказадиган Наманган шаҳар, Давлатобод туманидаги “Марказий” ўйингоҳда айни кунларда янги мавсумга тайёргарлик ишлари қизғин кечмоқда. Жумладан, мазкур ўйингоҳ директори Набихон Абдуғаниев бошчилигидаги ишчи-ходимлар бугун майдонга қопланган махсус плёнкани олиб, замонавий техникалар ёрдамида майдон чимини текислаш ишларини олиб боришди.

Шунингдек, ўйингоҳнинг мухлислар ўриндиғига тўсиқ қўйилган деворлари ҳамда панжара ва зиналар бўялмоқда.

Бундан ташқари, бўялган деворларга зарар етмаслиги, шунингдек, ёғингарчиликдан сақлаш мақсадида, ушбу деворларга 600 метрга яқин махсус тунука олиб келинди ва уларни ўрнатиш ишлари олиб борилмоқда.

Тошкентдан ташриф буюрган махсус мутахассислар эса “Марказий” ўйингоҳда яроқсиз ҳолатга келган дераза ойналарини алмаштириш ишларини олиб боришмоқда.

Бир сўз билан айтганда, “Марказий” ўйингоҳда янги мавсумга тайёргарлик ишлари авжида!

“Навбаҳор” ПФК матбуот хизмати.