Лучано Спалеттининг айтишича, "Рома" сардори Франческо Тотти ҳали яна икки йил юқори савияда тўп сура олади. Бу ҳақда Италия нашрлари хабар бермоқда.
"Зенит" бош мураббийи айни вақтда таътилни Италияда ўтказмоқда ва шу муносабат билан италиялик журналистлар ундан интервью олишган. Спаллетти, шунингдек, скудетто учун бу йилги курашда қайси жамоани фаворит деб ҳисоблашини ҳам айтиб ўтди.
"Скудетто учун курашда "Милан"ни фаворит деб ҳисоблайман. Лекин, тан олиш керак, Конте қўл остида "Ювентус" сезиларли ўзгаришларни амалга ошира олди", деди италиялик мутахассис.
"Тотти ҳақида тўхталадиган бўлсам, у камида ҳали яна икки йил юқори савияда футбол намойиш эта олади", дея қўшимча қилди "Зенит" бош мураббийи Лучано Спалетти.
Эслатиб ўтамиз, Спалетти 2005 йилдан 2009 йилга қадар Римнинг "Рома" жамоаси бош мураббийи сифатида иш олиб борган. Бу давр оралиғида жамоа икки марта Италия Кубоги ва бир марта Италия Суперкубогида ғалаба қозонган.













