Туркиянинг Белек шаҳрида бўлиб ўтган Германиянинг "Вердер" ва Голландиянинг АЗ клублари ўртасидаги ўртоқлик учрашувини болгариялик ҳакам Лучезар Ионов бошқа ҳакам — ватандоши Райчо Райчевнинг номидан бошқариб борган. Бу ҳақда BNT хабар бермоқда.

Ионов ва унинг ёрдамчилари — Петар Тарулов ва Эмил Митев, ўтган йили Болгария футбол иттифоқини огоҳлантирмасдан, Жанубий Америкадаги халқаро учрашувларни бошқарганликлари учун футболдан четлаштирилган эди. Болгария футбол иттифоқи ҳакамлар қўмитаси раиси Костадин Костадиновнинг айтишича, у бу воқеа ҳақида УЕФАни огоҳлантиради.

"Содир бўлган ҳодиса биз бир йил аввал қабул қилган қарорнинг тўғрилигини яна бир бор тасдиқламоқда. Мен улар бошқарган ўйин ҳақида бир қатор хабарларни ўқидим. Унга кўра, ҳакамлар учрашувнинг иккинчи бўлимига 10 дақиқа қўшиб беришган, ўша қўшимча дақиқаларнинг 9-сида баҳсли пенальти ва эркин зарба белгиланган", дейди Костадинов.