"Бугун Биринчи лига мавсуми старт олади. Про лига йўлланмаси учун 12 та клуб ғолиблик учун курашади.

Биринчи лига клублари фақатгина ғолиблик ҳақида эмас, чин маънода профессионал клубга айланиш ҳақида ҳам ўйлашлари лозим. Фақатгина шу йўл билан улар профессионал футбол клублари жамланган лигага йўл олишлари мумкин.

Про лига талаб ҳамда тартиб жиҳатидан ўз йўналишига тушиб бормоқда. 2-3 йилда бу лига янада ажойиб кўринишга келади. Энди навбат Биринчи лига клубларига. Ярим профессионал футбол клублари иштирок этадиган мазкур лигада ҳамма ҳам охиригача етиб бора олмаслиги мумкин.

Содда қилиб тушунтирганда, бухгалтерияси ишламайдиган, аудит натижалари футбол инкор қиладиган фактларни келтириб чиқарган клублар мавсумнинг ўртасида ҳам мусобақадан чиқариб юборилади. Бу ҳолат Регламентда акс этган, ҳар бир клуб таъсисчиси бу борада ЎзПФЛ билан алоҳида келишув имзолаган.

Биринчи лига учрашувлари фақатгина шанба ва якшанба кунларига тайин қилинган. Турли йўллар билан буни истамаган клублар бўлди. Бироқ талаб қатъий. Иш кунларидаги айрим кўзбўямачиликлардан тийилиш учун бу бизнинг навбатдаги қадам.

Ҳалол ва тўғри футболни қадрлайдиган, чинаккам клуб сифатида ишлайдиганлар билан биргамиз. Бизга шунчаки 10-15 футболчи йиғилмасидан иборат жамоа керак эмас. Бундай ҳаваскор жамоалар учун бизда Иккинчи лига мусобақаси бор"