"Bugun Birinchi liga mavsumi start oladi. Pro liga yo‘llanmasi uchun 12 ta klub g‘oliblik uchun kurashadi.
Birinchi liga klublari faqatgina g‘oliblik haqida emas, chin ma’noda professional klubga aylanish haqida ham o‘ylashlari lozim. Faqatgina shu yo‘l bilan ular professional futbol klublari jamlangan ligaga yo‘l olishlari mumkin.
Pro liga talab hamda tartib jihatidan o‘z yo‘nalishiga tushib bormoqda. 2-3 yilda bu liga yanada ajoyib ko‘rinishga keladi. Endi navbat Birinchi liga klublariga. Yarim professional futbol klublari ishtirok etadigan mazkur ligada hamma ham oxirigacha yetib bora olmasligi mumkin.
Sodda qilib tushuntirganda, buxgalteriyasi ishlamaydigan, audit natijalari futbol inkor qiladigan faktlarni keltirib chiqargan klublar mavsumning o‘rtasida ham musobaqadan chiqarib yuboriladi. Bu holat Reglamentda aks etgan, har bir klub ta’sischisi bu borada O‘zPFL bilan alohida kelishuv imzolagan.
Birinchi liga uchrashuvlari faqatgina shanba va yakshanba kunlariga tayin qilingan. Turli yo‘llar bilan buni istamagan klublar bo‘ldi. Biroq talab qat’iy. Ish kunlaridagi ayrim ko‘zbo‘yamachiliklardan tiyilish uchun bu bizning navbatdagi qadam.
Halol va to‘g‘ri futbolni qadrlaydigan, chinakkam klub sifatida ishlaydiganlar bilan birgamiz. Bizga shunchaki 10-15 futbolchi yig‘ilmasidan iborat jamoa kerak emas. Bunday havaskor jamoalar uchun bizda Ikkinchi liga musobaqasi bor"
