"Ювентус" асфоналаридан бири, 37 ёшли Алессандро дель Пьеро фаолиятини Канада жамоасида давом эттириши мумкин.
MLS чемпионатида иштирок этувчи канаданинг "Монреаль" жамоаси, италияик футболчини мавсум якунлангач ўз сафида кўришни истаётганлигини оммага эълон қилди. "Монреаль" бош мураббийи бундан бир неча кун олдин бошқа бир италиялик футболчи, Лука Тонига ҳам шартнома таклиф қилинишини айтиб ўтганди. Тони ҳозирча бу таклифга аниқ жавоб бергани йўқ. "Ўйчи ўйлагунича таваккалчи ишни битиради" қабилида иш тутаётган канадаликлар энди дель Пьерони нишонга олишди. Маълумотларга қараганда 37 ёшли футболчига жуда қулай шартнома таклиф этилган.
Эслатиб ўтамиз, дель Пьеронинг туринликлар билан амалдаги шартномаси шу йилнинг ёз ойида тугаши кўзда тутилган. Туринликлар агар унга янги шартнома таклиф қилишмаса, дель Пьеро ўзига янги жамоа ахтариши мумкин. Фаолияти сўнггида бошқа чемпионатларда, жумладан АҚШ чемпионатида ўзини синаб кўришни истаётганлигини яширмаган дель Пьеро, канадаликлар билан музокара олиб бораяпти.
