ПСЖ ҳужумчиси Неймар Бразилия терма жамоасида урилган голлар сони бўйича рекорд ҳақида гапирганда кўз ёшларини тиёлмади.
29 ёшли футболчи бунгача терма жамоа сафида 68 та гол урган, афсонавий Пеле эса 77 та гол билан рекордчи бўлиб қолмоқда.
«Пеле рекордига яқинлашаётганимни қандай ҳис қиляпман? Бу ўзгача ҳиссиёт. Сўнгги икки йил ичида кўп нарсаларни бошдан кечирдим.
Ушбу статистик маълумотлар Бразилия термасида ўз мамлакатим ва оилам номидан ўйнаганимдан қанчалик хурсанд эканлигимни кўрсатади. Мен бу каби ҳикояларни жуда яхши кўраман.
Мен ўз тарихимни ёзаман. Айнан мана бу ерда. Мен оилам ва дўстларим мен билан фахрланишларини истайман», дейди Неймар ва кўз ёшларини тийиб тура олмади.
Ҳужумчи Бразилия терма жамоасида 2010 йилдан бери ўйнаб келмоқда. У 107 ўйинда 68 та гол урган.
