Мадриднинг «Реал» клуби бош мураббийи Жозе Моуриньо жамоанинг туркиялик ярим ҳимоячиси Нури Шаҳинни қўйиб юбормоқчи эмас. Бу ҳақда Испаниянинг «Marca» нашри хабар бермоқда.
«Шаҳин клуб билан беш ойлик эмас, беш йиллик шартнома имзолаган. Энди унда жамоа учун керакли ўйинчи эканлигини, ўзи учун сарфланган пуллар ҳавога учмаганини кўрсатиб, танқидчиларини ишонтириш учун етарлича вақт бор», деди португалиялик мутахассис.
Хабарларга кўра, Моуриньо Шаҳин ўзининг энг яхши жисмоний ҳолатига чиқишини кутмоқда; мураббийнинг фикрича, айнан шундай ҳолатда майдонга тушган ўйинчи яхшироқ ўйин кўрсатиб, ишқибозлар ва матбуотнинг ортиқча танқидидан қутулиб қолиши мумкин.