Европа чемпионатида гуруҳ босқичининг дастлабки 2та тур ўйинлари якунланди. Бугун эса гуруҳнинг сўнгги тур баҳсларига старт берилади. Хўш, мусобақа регламентига кўра, жамоаларнинг очколари тенг келиб қолганида уларнинг гуруҳдаги ўринлари қандай аниқланади? Шунга тўхталиб ўтамиз. Зеро, мухлислар учун бу фойдали бўлади.

Жамоаларнинг гуруҳдаги ўринлари қуйидаги тамойиллар асосида аниқланади:

A) ўзаро ўйинларда кўп очко тўплаган жамоа;

B) ўзаро ўйинларда яхши тўплар нисбатига эга бўлган жамоа;

С) ўзаро ўйинларда кўп гол урган жамоа;

D) ушбу 3та тамойил қўлланилганидан кейин иккита жамоанинг кўрсаткичи тенг бўлиб турган бўлса, мазкур тамойиллар фақат ушбу икки жамоага нисбатан қайтадан қўлланилади. Шунда ҳам ўринларни аниқлашнинг имкони бўлмаса:

E) гуруҳнинг барча ўйинларида энг яхши тўплар фарқига эга бўлган жамоа;

F) гуруҳнинг барча ўйинларида кўп гол урган жамоа;

G) гуруҳ босқичида кўпроқ ғалаба қозонган жамоа;

H) Юқоридаги тамойилларни қўллагандан кейин ҳам фақат икки жамоанинг натижалари бир хил бўлса ва бу жамоалар гуруҳнинг сўнгги турида ўзаро тўқнаш келишган бўлса, бу жамоалар ўйиндан кейин пенальтилар сериясида иштирок этишади (2тадан ортиқ жамоанинг кўрсаткичлари бир хил бўлса, пенальти тепилмайди).

I) Fair Play қоидаси ҳисоб-китоб қилинади (огоҳлантириш — 1 балл; иккинчи сариқ карточка — 3 балл; тўғридан-тўғри қизил карточка — 3 балл, сариқ карточка кетидан тўғридан-тўғри қизил карточка — 4 балл).

J) УЕФАнинг коэфициентлар жадвалида терма жамоанинг ўрни.

Хабарингиз бор, гуруҳларда 1 ва 2-ўринни эгаллаган жамоалар нимчорак финал йўлланмасини қўлга киритишади. Шунингдек, 3-ўринни эгаллаган жамоалар орасидан 4та жамоа ҳам плей-офф йўлланмаси берилади. Гуруҳлардаги 3-ўринни эгаллаган терма жамоалар рейтинги қуйидагича тузилади:

А) энг кўп очко жамғарган жамоа;

B) энг яхши тўплар нисбати;

С) кўп гол урган жамоа;

D) кўп ғалаба қозонган жамоа;

E) Fair Play қоидаси ҳисоб-китоб қилинади (огоҳлантириш — 1 балл; иккинчи сариқ карточка — 3 балл; тўғридан-тўғри қизил карточка — 3 балл, сариқ карточка кетидан тўғридан-тўғри қизил карточка — 4 балл);

F) УЕФАнинг коэфициентлар жадвалида терма жамоанинг ўрни.