Yevropa chempionatida guruh bosqichining dastlabki 2ta tur o‘yinlari yakunlandi. Bugun esa guruhning so‘nggi tur bahslariga start beriladi. Xo‘sh, musobaqa reglamentiga ko‘ra, jamoalarning ochkolari teng kelib qolganida ularning guruhdagi o‘rinlari qanday aniqlanadi? Shunga to‘xtalib o‘tamiz. Zero, muxlislar uchun bu foydali bo‘ladi.

Jamoalarning guruhdagi o‘rinlari quyidagi tamoyillar asosida aniqlanadi:

A) o‘zaro o‘yinlarda ko‘p ochko to‘plagan jamoa;

B) o‘zaro o‘yinlarda yaxshi to‘plar nisbatiga ega bo‘lgan jamoa;

S) o‘zaro o‘yinlarda ko‘p gol urgan jamoa;

D) ushbu 3ta tamoyil qo‘llanilganidan keyin ikkita jamoaning ko‘rsatkichi teng bo‘lib turgan bo‘lsa, mazkur tamoyillar faqat ushbu ikki jamoaga nisbatan qaytadan qo‘llaniladi. Shunda ham o‘rinlarni aniqlashning imkoni bo‘lmasa:

E) guruhning barcha o‘yinlarida eng yaxshi to‘plar farqiga ega bo‘lgan jamoa;

F) guruhning barcha o‘yinlarida ko‘p gol urgan jamoa;

G) guruh bosqichida ko‘proq g‘alaba qozongan jamoa;

H) Yuqoridagi tamoyillarni qo‘llagandan keyin ham faqat ikki jamoaning natijalari bir xil bo‘lsa va bu jamoalar guruhning so‘nggi turida o‘zaro to‘qnash kelishgan bo‘lsa, bu jamoalar o‘yindan keyin penaltilar seriyasida ishtirok etishadi (2tadan ortiq jamoaning ko‘rsatkichlari bir xil bo‘lsa, penalti tepilmaydi).

I) Fair Play qoidasi hisob-kitob qilinadi (ogohlantirish — 1 ball; ikkinchi sariq kartochka — 3 ball; to‘g‘ridan-to‘g‘ri qizil kartochka — 3 ball, sariq kartochka ketidan to‘g‘ridan-to‘g‘ri qizil kartochka — 4 ball).

J) UEFAning koefisiyentlar jadvalida terma jamoaning o‘rni.

Xabaringiz bor, guruhlarda 1 va 2-o‘rinni egallagan jamoalar nimchorak final yo‘llanmasini qo‘lga kiritishadi. Shuningdek, 3-o‘rinni egallagan jamoalar orasidan 4ta jamoa ham pley-off yo‘llanmasi beriladi. Guruhlardagi 3-o‘rinni egallagan terma jamoalar reytingi quyidagicha tuziladi:

A) eng ko‘p ochko jamg‘argan jamoa;

B) eng yaxshi to‘plar nisbati;

S) ko‘p gol urgan jamoa;

D) ko‘p g‘alaba qozongan jamoa;

E) Fair Play qoidasi hisob-kitob qilinadi (ogohlantirish — 1 ball; ikkinchi sariq kartochka — 3 ball; to‘g‘ridan-to‘g‘ri qizil kartochka — 3 ball, sariq kartochka ketidan to‘g‘ridan-to‘g‘ri qizil kartochka — 4 ball);

F) UEFAning koefisiyentlar jadvalida terma jamoaning o‘rni.