Ўз майдонида “Реал Сосьедад”ни қабул қилган “Барселона” бироз экспериментал таркибни туширди. Хави, Иньеста, Санчес, Пике, Бускест, Абидаль каби футболчиларни захирада қолдирган каталонияликлар бутун учрашув мобайнида ташаббусни сақлаб турган бўлсалар-да, голлар етишмовчилиги катта босимни юзага келтирди. Айниқса сўнгги дақиқаларда меҳмонлар ҳисобни тенглаштиришлари ҳам мумкин эди.
Ўйин мезбонлар учун муваффақиятли бошланди. Месси жарима майдонига кириб борган Тельони тўп билан таъминлади. Ёш ҳужумчи эса ўткир бурчак остида бўлишига қарамасдан ҳам дарвозабонни доғда қолдирди, ҳам тўғри зарба бера олди. Жуда кўп қулай вазиятларни қўлдан чиқарган Месси ниҳоят, иккинчи таймда гол киритишнинг уддасидан чиқди. Алвешнинг юқорилатиб жарима майдонига етказган тўпини чап оёқда зарба билан дарвозага киритди – 2:0.
Орадан бир дақиқа ҳам вақт ўтмади. Ҳимоя марказида Пуйолнинг позицион хатосидан фойдаланган Карлос Вела Вальдес билан яккама якка чиқиб, ҳисобни қисқартира олди. Шундан сўнг жамоаларда имкониятлар юзага келган бўлса-да, ҳисоб ўзгармади. Айтганча, иккинчи бўлимда майдонга тушган Бускест жароҳат олиб майдонни тарк этганини таъкидлаш жоиз.
БАРСЕЛОНА – РЕАЛ СОСЬЕДАД – 2:1
Голлар: Тельо (9), Месси (72), 2:1 – Вела (73).
БАРСЕЛОНА: Вальдес, Дани Алвес, Маскерано, Пуйоль (Абидаль, 76), Адриано, Алькантара, Фабрегас, Дос Сантос (Бускетс, 76; Пике, 83), Куэнка, Тельо, Месси.
РЕАЛ СОСЬЕДАД: Клаудио Браво, К. Мартинес, И. Мартинес, Микель Гонсалес, Кадамуро, Аранбуру, Бергара, Пардо (Хосеба Льоренте, 77), Хаби Прието (Агиррече, 84), Ифран (Вела, 58), Гризманн.
Огоҳлантиришлар: И. Мартинес (34), Хосеба Льоренте (88).
Турнинг бошқа ўйинлари:
05.02. СПОРТИНГ ХИХОН - ОСАСУНА
05.02. СЕВИЛЬЯ – ВИЛЬЯРЕАЛ
05.02. САРАГОСА – РАЙО ВАЛЬЕКАНО
06.02. АТЛЕТИКО – ВАЛЕНСИЯ
07.02 ГРЕНАДА - МАЛАГА
