«Милан» вице-президенти Адриано Галлианининг айтишича, у Массилиано Аллегри жамоасини бу йилги чемпионатнинг фаворити деб ҳисобламайди. Бу ҳақда «La Gazzetta dello Sport» хабар бермоқда.

Италия чемпионати 22-туридан сўнг мусобақа жадвалида Туриннинг «Ювентус» клуби 45 очко билан пешқадамлик қилаётган бўлса, амалдаги чемпион «Милан» ҳисобида 44 очко бор. Эътиборли томони, «Ювентус» асосий рақибига нисбатан битта кам ўйин ўтказган.

«Ювентус» бош мураббийи Антонио Конте баъзи масалалар ҳақида гапираётган вақтда айёрлик қилмоқда... У бу гапларни ўз жамоаси эътиборга тушиб қолмаслиги учун айтяпти», деди Галлиани.

«Бизни фаворитга айлантириб қўйиши мумкин бўлган бирорта ҳам сабабни кўраётганим йўқ. Айни вақтда «Милан»да жароҳат олган футболчиларнинг сонидан келиб чиқиб гапирадиган бўлсак, бизни ҳеч фаворит деб бўлмайди», дея қўшимча қилди «Милан» вице-президенти Адриано Галлиани.