Португалиянинг «Спортинг» клуби футболчи трансферида келишилган шартни бузганлик учун Италиянинг «Интер» клубидан 30 миллион евро маблағ талаб қилмоқда. Бу ҳақда «Спортинг» клуби расмий сайти хабар берди.
Клуб 2016 йилда португалиялик Жоау Мариони «Интер»га трансфер қилганди. Шартнома шартида италян клуби футболчини Португалиянинг бирон-бир клубига сотса, қўшимча 30 миллион евро тўлаши кераклиги кўрсатилган.
2021 йилнинг 13 июль куни португалиялик 28 ёшли футболчининг «Интер» билан шартномаси якунланди. Милан шаҳри клуби Мариони Португалиянинг бошқа бир клуби «Бенфика»га трансфер қилди. Бу орқали «Интер» «Спортинг» билан имзоланган шартнома талабини бузди.
«Спортинг» клуби раҳбарияти мазкур ҳолат шундоқлигича қолмаслигини, миланликлар тўлаб бериши керак бўлган 30 миллион евро миқдордаги маблағни тегишли органлар орқали ундириб олишини билдирган.
