«Астон Вилла» дарвозабони Шэй Гивеннинг таъкидлашича, «Манчестер Сити» посбони Жо Хартни Англия терма жамоаси сардори этиб тайинлаш керак. Бу ҳақда «Sky Sports» хабар бермоқда.

«Ҳаммаси терма жамоага қандай мураббий келишига боғлиқ. Баъзи сабабларга кўра, кўплаб мутахассислар дарвозабонларни сардор этиб тайинлашни ёқтиришмайди. Бу, менимча, ғалати ҳолат», деди ирландиялик дарвозабон.

«Жо Харт ортиқча муаммосиз Англия терма жамоасига сардорлик қилиши мумкин. Дино Дзофф ва Икер Касильяс ўз термалари билан бирга эътиборга молик совринларни қўлга киритишган, шунинг учун ҳам мен дарвозабонларга сардорлик боғичини ишониб топшириш керак, деб ҳисоблайман», деди Гивен.

«Харт Англия терма жамоасида ҳам, «Манчестер Сити»да ҳам биринчи рақамли дарвозабон сифатида кўрсата олди. Ўйлашимча, у бу жойни узоқ муддатга ўзи учун кафолатлаб қўйди», дея қўшимча қилди «Астон Вилла» дарвозабони Шэй Гивен.

Эслатиб ўтамиз, Англия футбол уюшмаси «КПР» ҳимоячиси Антон Фердинандни ирқий камситганликда айблаб, «Челси» ҳимоячиси Жон Террини терма жамоа сардорлик боғичидан маҳрум қилганди. Ушбу қарор, ўз навбатида, Фабио Капеллонинг Англия терма жамоаси бош мураббийлигидан истеъфога чиқишига сабаб бўлди. Айни вақтда Англия терма жамоасининг бош мураббийи ҳам, сардори ҳам йўқ.