Украин ёки Беларус клублари нима сабабданўзбек футболчиларига қизиқиб қолди? ПФЛ директори Диёр Имомхўжаев мазкур ҳолатга бироз ойдинлик киритди.
"Энергетик-БГУ", "Рух" ёки шунга ўхшаш Беларус, Украина клубларининг ўзбекистонлик футболчиларга қизиқа бошлагани бежизга эмас.
Биринчи навбатда бу ишда ўзимизнинг агентлар муҳим роль ўйнаяпти. Улар унча қиммат бўлмаган нархга ёш ва хорижга чиқиш истагида бўлган савияли ўзбекистонлик футболчиларни қўлга киритиш мумкинлигига уларни ишонтира олишди. Ва албатта айрим футболчилар чиндан ҳам шундай эканлигини ўз ўйинлари билан исботлашди.
Қолаверса, Элдор Шомуродов, Одил Аҳмедов каби футболчилар фонида кўриш мумкинки, яхши трансфер эртага катта даромад келтириши ҳам мумкин. Айтайлик, Элдорни олган "Ростов", Одилни олган "Анжи", "Краснодар" каби клублар нафақат уларнинг тажрибасидан фойдаланди, балки кейинчалик амалга оширилган трансферлардан пул ҳам ишлаб олди. Бу ҳолат табиийки ўзбекистонлик футболчиларга бўлган эътибор ва ҳурматни яхшигина оширади.
Шундан келиб чиқилса, биз катта маош сўрайдиган футболчиларни ўзимизнинг клубларда ушлаб туришдан кўра, истеъдодли ёш футболчиларни реклама қила олишдан кўпроқ манфаатдормиз", дейди ПФЛ раҳбари ўз телеграм каналида.
