Ukrain yoki Belarus klublari nima sababdano‘zbek futbolchilariga qiziqib qoldi? PFL direktori Diyor Imomxo‘jayev mazkur holatga biroz oydinlik kiritdi.

"Energetik-BGU", "Rux" yoki shunga o‘xshash Belarus, Ukraina klublarining o‘zbekistonlik futbolchilarga qiziqa boshlagani bejizga emas.

Birinchi navbatda bu ishda o‘zimizning agentlar muhim rol o‘ynayapti. Ular uncha qimmat bo‘lmagan narxga yosh va xorijga chiqish istagida bo‘lgan saviyali o‘zbekistonlik futbolchilarni qo‘lga kiritish mumkinligiga ularni ishontira olishdi. Va albatta ayrim futbolchilar chindan ham shunday ekanligini o‘z o‘yinlari bilan isbotlashdi.

Qolaversa, Eldor Shomurodov, Odil Ahmedov kabi futbolchilar fonida ko‘rish mumkinki, yaxshi transfer ertaga katta daromad keltirishi ham mumkin. Aytaylik, Eldorni olgan "Rostov", Odilni olgan "Anji", "Krasnodar" kabi klublar nafaqat ularning tajribasidan foydalandi, balki keyinchalik amalga oshirilgan transferlardan pul ham ishlab oldi. Bu holat tabiiyki o‘zbekistonlik futbolchilarga bo‘lgan e’tibor va hurmatni yaxshigina oshiradi.

Shundan kelib chiqilsa, biz katta maosh so‘raydigan futbolchilarni o‘zimizning klublarda ushlab turishdan ko‘ra, iste’dodli yosh futbolchilarni reklama qila olishdan ko‘proq manfaatdormiz", deydi PFL rahbari o‘z telegram kanalida.