Ўзбекистон футбол федерацияси Хитойнинг Вейфанг шаҳрида ташкил этилажак халқаро мусобақа ташкилотчиларидан расмий таклиф олди.

2012 йилнинг 20-26 июль кунлари Хитойнинг Вейфанг шаҳрида ёшлар жамоалари ўртасида халқаро «Умид Кубоги» мусобақаси ўтказилади. Мусобақада турли ёшдаги жамоа 48 та ёшлар жамоалари иштирок этади. Улардан 30 таси Хитой жамоалари бўлса, қолган 18 таси хорижий жамоалардан иборат бўлади.

«Умид қиламанки, ушбу мусобақа ўзаро дўстик ва ҳамкорлик алоқаларимизни янада мустаҳкамлайди», деб ёзади мусобақа ташкилотчиси ҳисобланган Вейфанг спорт федерациялари уюшмаси раиси Ли Ю Жин ЎФФ юборган таклиф хатида.

Ўзбекистон вакиллари ушбу мусобақада аввал ҳам иштирок этган. Мусобақа «Вейфанг Кубоги» деб аталган 2007 йили Аҳмад Убайдуллаев қўл остидаги Ўзбекистон ёшлар терма жамоаси тўртинчи ўринни қўлга киритган, ҳужумчи Санъат Шихов эса 5 та гол билан мусобақа тўпурарига айланган эди.

ЎФФ айни вақтда «Умид кубоги» ташкилотчилари таклифини ўрганиб чиқмоқда.