22 нафар футболчи билан Дубайдан Масқат шаҳрига йўл олган Ўзбекистон олимпия терма жамоаси кеча Уммон пойтахтига етиб борган эди.
Бугун Тошкент вақти билан 19:30 да ҳар икки мамлакат олимпия терма жамоалари ўртасида ўртоқлик ўйини бўлиб ўтади.
Мазкур беллашув икки томон учун ҳам фойдали эканини таъкидлаш лозим. Уммон олимпиячилари «А» гуруҳида 7 очко жамғариб, 2-ўринни банд этиб туришибди. 8 очкога эга Жанубий Корея олимпиячилари 22 февраль куни Масқатда меҳмон бўлишади. Шу боисдан ҳам уммонликлар расмий ўйинга жиддий тайёргарлик олиб боришмоқда. Ўзбекистон эса ИФФ билан келишган ҳолда Ироқ олимпия терма жамоасига қарши ўйинни бир кун аввал, яъни, 21 февраль куни ўтказади. Гарчи ироқликлар Лондон олимпиядасидан умидларини узган бўлишса-да, Қатар пойтахти Доҳада ўтадиган беллашувда вакилларимизга осон бўлмаслиги аниқ.
18 февралга қадар Уммонда шуғулланадиган Вадим Абрамов шогирдлари шу куни Масқат-Доҳа йўналиши орқали Қатарга йўл олишади.
Ироққа қарши ўтадиган ўйиннинг эртасига мураббий 4 нафар футболчи: Жасур Ҳасанов, Акбар Исматуллаев, Ойбек Қиличев ва Дилшод Раҳматуллаев билан Сеулга йўл олса, қолган 18 нафар футболчи ёрдамчи мураббийлар билан Дубайга қайтиб келади. 24 февраль куни олимпиячиларимиз Миср термасига қарши майдонга чиқишади.
Эслатиб ўтамиз, йиғин доирасида Ўзбекистон илк ўйинни Филиппин миллий терма жамоасига қарши ўтказиб, 3:0 ҳисобида устун келганди.
