Европа футболида янги мавсум жуда қизғин тарзда бошланди. Жамоалар ўз сафига қўшиб олган янги футболчилар аллақачон ўзларини кўрсатишни бошлаб юборган бўлса, айрим футбол вакиллари борки, улар умуман ОАВ ва мухлислар нигоҳидан четда қолиб кетишяпти.
Эътибордан бироз четга чиқиб қолганлар бу ҳозирда ишсиз бўлган мураббийлардир. Келинг, ҳозирда ҳеч қаерда фаолият кўрсатмаётган мураббийларни кўриб чиқамиз.
Женнаро Гаттузо (43 ёш, Италия)
2021 йил июнидан бери ишсиз
Охирги клуби - «Наполи»
Ўтган мавсум натижаларига кўра, Гаттузо «Наполи»ни Чемпионлар Лигасига олиб чиқа олмади. Жамоа А Серияда бешинчи ўринни эгаллади. Неаполда улар буни кечира олмадилар ва Женнаро кетди. Гаттузо жамоадан кетганига кўп вақт ўтмай бошқа жамоа билан келишувларни ҳам бошлаб юборганди. Унинг кейинги жамоаси «Фиорентина» бўлиши мумкин эди, лекин у клуб раҳбарлари билан трансферлар борасида келиша олмагандан сўнг клубни тарк этган.
Кике Сетьен (62 ёш, Испания)
2020 йил августидан бери ишсиз
Охирги клуб - «Барселона»
Испан мутахассиси 2019/2020 йилги мавсумда Каталония клуби учун қутқарувчига айлана олмади, балки Чемпионлар Лигаси чорак финалида «Бавария»дан 2:8 ҳисобида мағлубиятга учраб, жамоа тарихига ўзидан қайғули хотирани қолдирди. Шу билан у ўз жойини Роналд Куманга бўшатиб берди. Бироқ, ҳозиргача ҳеч ким Сетьенни иш қидирувчи сифатида эсга олмади. Лекин бундай мураббийлар кўп вақтини ишсиз ўтказиши мумкин эмас. Кикени тез орада майдон четида кўришга умид қилиб қоламиз.
Эрнесто Вальверде (57 ёш, Испания)
2020 йил январидан бери ишсиз
Охирги клуб - «Барселона»
Сетьен сингари Валверде ҳам охирги ойларда фақат «Барселона»даги фаолияти хотиралари билан яшади. Унинг ўрнини ўша Кике эгаллаган. Эрнесто ҳамкасби сингари ҳалигача таътилда. Бу вақтда Вальверде мураббийликнинг бошқа жиҳатларини яхши ўзлаштириб бораётгани аниқ. Демак, у ҳали охирги мураббийлик сўзини айтмаган.
Андрей Шевченко (44 ёш, Украина)
2021 йил июль ойидан бери ишсиз
Охирги жамоаси - Украина терма жамоаси
2004 йилги «Олтин тўп» соҳибининг бош мураббий сифатидаги ҳозирча биринчи ва сўнгги ишлаган жойи Украина терма жамоаси бўлиб турибди. Ҳеч кимга сир эмаски, Шевченконинг «кўк-сариқ»лар билан ишлаш жараёнидаги қарорларнинг ярмини унинг қўл остидаги мураббийлар қилган. Чунки жамоада ҳамжиҳатлик яхши даражада бўлган. Шевченко жамоаси билан Евро-2020 чорак финалигача чиқди. У ўз хоҳиши билан терма жамоадан кетганини инобатга оладиган бўлсак, уни тез орада бошқа клуб ёки терма жамоа мураббийи сифатида кўриш имкониятимиз бор. Кутамиз !
Френк Лемпард (43 ёш, Англия)
2021 йил январидан бери ишсиз
Охирги клуби - «Челси»
Лемпард «аристократлар» бошидаги мураббийлар ўриндиғида ўзини тўлиқ намойиш қила олмади, лекин у бир ярим йил жамоа билан ишлаганидан сўнг, ўзининг етакчи ҳислатларини кўрсатиб улгурди. Бу даражадаги мутахассислар Англияда қадрланади. Лекин уларнинг асосий муаммоси шундаки, улар ўзларининг даражасидан паст клублар билан ишлай олмайди.
Антонио Конте (52 ёш, Италия)
2021 йил май ойидан бери ишсиз
Охирги клуби - «Интер»
Конте «Ювентус»нинг А Сериядаги узоқ муддатли гегемонлигини бузишга муваффақ бўлган ҳолда «нерадзурри» лагерини чемпион мақомида тарк этди. У характери ва принциплари туфайли «Интер» билан ишлашни давом эттира олмади. Антонио Конте янги жамоасини кутаётган мураббийлар орасида етакчилардан бири эканлигини тахмин қилиш қийин эмас. Кўп манбаларда келтирилишича унинг кейинги клуби лондоннинг «Арсенал»и бўлиши мумкин. Чунки лондоклирнинг ҳозирги натижаларини қониқарли деб бўлмайди ва тез орада Артета жамоани тарк этиши кутиляпти.
Зинедин Зидан (49 ёш, Франция)
2021 йил май ойидан бери ишсиз
Охирги клуб - "Реал Мадрид"
Француз «галактикос» билан Европа ва жаҳон клублари футболида эришиш мумкин бўлган ҳамма нарсага эришди. У Сантяго Бернабеуни бошини тик тутган ҳолда тарк этди. Замонавий футбол оламининг энг кучли мураббийларидан бири бўлган Зинедин Зидан каби тоифадаги мутахассисни кўпчилик клублар ўзи таркибида кўришни хоҳлашади. Лекин буни мураббийнинг ўзи хоҳлайдими?
Руслан Максимов тайёрлади
