Тошкентда машғулотлар олиб бораётган Наманганнинг "Навбаҳор" клуби легионерлар лимитини тўлдирди. Бу ҳақда "Lochinlar.Uz" интернет навшри хабар тарқатмоқда.

"Легионерлар ҳақида гап кетганда мураббийлар 3+1 лимитидан тўлиқ фойдаланишни мақсад қилишган. Денис Романенко ҳамда Артурас Фоменколар икки ўринни банд этиб бўлишган. Бир ўрин учун эса Роман Гаркуша ҳамда украиналик ярим ҳимоячи кураш олиб боришмоқда. Шу икки футболчидан бири янги мавсумни "Навбаҳор"да бошлаши мумкин", деб ёзилади клуб мухлислар сайтида берилган хабарда.

Осиёлик футболчига ажратилган ўринни, кўп эҳтимол билан туркманистонлик Максим Белих банд этади. Демак, легионерлар масаласи деярли ҳал бўлиб қолди.

Манбада ёзилишича, Тошкент йиғини якунланаётган чоғда жамоа дастлабки талабномани ПФЛ га тақдим этади.

Жамоа бугунга белгиланган икки маҳал машғулотларни якунлади. Таркибда ҳозирча ўзгариш кузатилганича йўқ. Янги келганлар ҳам астойдил ўзларини кўрсатишга ҳаракат қилишмоқда.

Бугун жамоа ёшлари "Андижон" ёшлари билан назорат учрашувини ўтказишиб, 1:0 ҳисобида зафар қучишди. Бир неча кун олдин эса ёшлар таркиби "Чуст-Пахтакор"га имкониятни бой берганди, 1:2.