«Насаф» – «Суғдиёна» учрашуви якунига етгач, жиззахликлар бош мураббийи Даврон Файзиев Voha.uz сайтига ўйин ҳақидаги фикрларини билдириб ўтди. Шунингдек, янги бош мураббий жамоаси олдига қўйилган вазифа ва «Насаф»нинг ОЧЛда иштироки борасида ҳам гапириб ўтди.

«Бугунги учрашув анча қизиқарли ўтди. «Насаф» ўйин давомида тўлиқ устунликка эришди. Шогирдларим учун бу учрашув анча тажриба мактаби бўлди, десам янглишмаган бўламан. Бердиев шогирдлари учун ҳам бу баҳс 6 мартда бўлиб ўтадиган жиддий учрашув олдидан яхши тайёргарлик баҳси бўлди», дейди Файзиев ўйин ҳақида гапираркан.

«Мақсадимиз олий лигага жамоани қайтариш. Умуман жамоа ўйинини шакллантириб бориш, бугунги баҳс жамоага керакли натижаларни берди, деб ўйлайман. Сабаби қаерда хато ва камчиликларимиз борлигига шунақанги жиддий жамоаларга қарши баҳсларда билиб оламиз», дея янги мавсум режалари билан ўртоқлашди мураббий.

«Насаф» анча тажрибали жамоа саналади, Бу тажриба ОЧЛда ҳам қўл келиши шубҳасиз. Умид қиламанки, қаршиликлар ОЧЛда юртимиз шаънини муносиб ҳимоя қилишади. Мен «Насаф»га омад тилаб қоламан», дея сўзини якунлади Даврон Файзиев.