10 март куни БААнинг Дубай шаҳрида футзал бўйича 2012 йилги Осиё чемпионати учун қуръа ташлаш маросими бўлиб ўтади. Қитъа чемпионатининг финал қисми эса 25 майдан 1 июнга қадар айнан БААда ташкил этилади.
Аввалроқ қуръа маросими вақти эълон қилинган бўлсада, энди якуний вақт сифатида 12:00 (Тошкент вақти билан 13:00) кўрсатиб ўтилди.
Айни пайтда Осиё чемпионати учун барча саралаш турнирлари ўз якунига етиб, қитъа чемпионлиги учун курашувчи 16 мамлакат номи аниқ бўлган. Булар: Австралия, Хитой Тайпейи, Индонезия, Эрон, Япония, Жанубий Корея, Кувайт, Қирғизистон, Ливан, Қатар, Тожикистон, Таиланд, Туркманистон, Ўзбекистон ва мезбон БАА терма жамоалари.
Ёдингизда бўлса, сўнгги Осиё чемпионати 2010 йил Тошкентда бўлиб ўтганда, Сержио Сапо бошқарувидаги Ўзбекистон футзал терма жамоаси иккинчи ўринни қўлга киритганди. Бундан келиб чиқиб 10 март куни Ўзбекистон футзал терма жамоаси 1-саватчадан жой олади. Айтиш керакки, 25 май – 1 июнь кунлари БААда бўлиб ўтадиган навбатдаги Осиё чемпионати шу йилнинг куз фаслида Таиландда ўтказиладиган жаҳон чемпионатига йўлланма тақдим этади. 10 март куни бўлиб ўтадиган қуръа маросимида Ўзбекистон футзал терма жамоаси бош мураббий Хосе Мария Мендез ҳам иштирок этади.
