"Манчестер Юнайтед" мухлислари томонидан дарвозабон Давид Де Хеа жамоанинг ноябрь ойидаги энг яхши футболчиси деб топилди.
Клуб матбуот хизматининг хабар беришича, Де Хеа 2018 йилнинг февралидан бери илк бор ойнинг энг яхши футболчиси совринини қўлга киритди.
Ноябрь ойида 31 ёшли дарвозабон “қизил иблислар” сафида барча мусобақаларда еттита ўйинда майдонга тушди, шундан иккитаси дарвозаси дахлсизлигини сақлаб қолди.
“Мен жамоага ёрдам бериш истагидаман. Муҳим дақиқаларда сейв қилишга ҳаракат қиламан. Шунинг учун мен шу ердаман. Ҳозир мен яхши ўйнаяпман ва жамоага ёрдамим тегябди.
Ростини айтсам, мавсум бошиданоқ ўзимни жуда яхши ҳис қиляпман. Мен ўзимни янада ишончли ва руҳий жиҳатдан кучли деб ҳисоблай оламан. Албатта, бу мукофотдан жуда хурсандман. Мухлисларга раҳмат.
«Манчестер Юнайтед» бир неча қийин ҳафталарни ўтказди, аммо охирги натижалар яхши. Биз ҳам худди шундай руҳда давом этишга ҳаракат қиламиз”, - дейди Де Хеа.
Эслатиб ўтамиз, сентябрь ва октябрь ойларида Криштиану Роналду ойнинг энг яхши футболчиси учун совринларни олган эди.
