“Металлург” ПФК жамоанинг тажрибали посбони Александр Лобанов ҳамда 2021 йилги мавсумда энг кўп майдонга тушган ярим ҳимоячи Дамир Темировлар билан шартномани узайтирди. Мазкур футболчиларнинг олдинги шартнома муддати шу йилнинг 31 декабрь куни якунига етаётганди.

Ўз вақтида Ўзбекистон миллий терма жамоасида ўйнаган Александр Лобанов бу йил бекободликлар сафида 16 учрашувда майдонга тушди ва 1440 дақиқа мобайнида “Металлург” дарвозасини қўриқлади. Тўртта ўйинда у дарвозаси даҳлсизлигини сақлаб қолди. 20 та гол ўтказиб юборди ва 4 марта сариқ карточка билан “сийланди”.

Дамир Темиров эса 2021 йилги мавсумда “Металлург”нинг барча 26 учрашувида майдонга тушган ягона ўйинчиси ҳисобланади. У 2138 дақиқа майдондаги фаолияти давомида рақиблар дарвозасига 4 та гол киритди. 2 та голлик узатмани амалга оширди. 1 марта пенальтидан унумли фойдаланди. 5 марта сариқ карточка “лойиқ кўрилди”.