Аллақачон янги мавсум тадоригини бошлаб юборган “Металлург” ПФК раҳбарияти таркибни кучайтиришга алоҳида эътибор қаратмоқда. Жумладан, жамоа ўз вақтида “Металлург” шарафини ҳимоя этган, сўнгги мавсумларни Наманганнинг “Навбаҳор” жамоасида ўтказган тажрибали ярим ҳимоячи Исломбек Исоқжонов билан шартнома имзолади.

Исломбек Исоқжонов 2017–2019 йиллар мобайнида бекободликлар сафида тўп сурганди. Кучлилар сафидаги фаолиятини Олмалиқда бошлаган Исоқжонов кейинчалик “Сўғдиёна”, “Андижон”, “Навбаҳор” жамоаларида ўтказган. 2020 йилдан эътиборан эса яна Наманган вилояти бош жамоасида тўп тепиб келаётганди.

Бугунгача Исломбек Исоқжонов Ўзбекистон миллий чемпионати баҳсларида 159 та ўйинда майдонга тушган. Рақиблар дарвозасига 20 та тўп киритган. 35 марта сариқ карточка билан жазоланган.

Исломбек Исоқжонов – 28 ёшда. 1993 йилнинг 29 апрель санасида таваллуд топган.
Амплуаси – ярим ҳимоячи.
Бўйи – 176 см.
Вазни – 77 кг.