“Бунёдкор” сардори учун бу галги ўйин “Похан”га қарши ўтадиган ҳисоб бўйича учинчи учрашувдир. Карпенко 2009 йилги чорак финал беллашувларининг иккаласида ҳам тўп сурган.

- Аввалги икки баҳсда сиз биттадан гол киритгансиз. Бу сафар нима бўлади?

- Менинг фикримча, эртага анча қизиқарли ўйин бўлади. Уч йил олдинги ҳолатга қараганда, жамоалар сезиларли равишда янгиланиб кетган. Биз умуман янгиланиб кетдик. “Похан” ҳам тамомила бошқа таркибга эга.

Эртага биздан ким гол уришидан қатъи-назар, бу яхши бўлади. Айнан кимнинг гол киритиши - бу биринчи даражали нарса эмас. Асосийси - урсак бўлди. Бу мен бўламанми ёки бошқа жамоадошимми - буни эртанги ўйин кўрсатади.

- Уч йил олдингига нисбатан “Похан” кучайганми ёки аксими?

- Кучсизланмагани - бу аниқ. Ҳозир уларда бошқа легионерлар. Жамоа таркиби ёшарган. Аммо клуб ўша баланд савиясида қолган. “Похан Стилерз”нинг 2009 йилги таркиби жуда кучли эди. Ҳозиргисини яхши билмайман. Лекин жорий таркибни ҳам кучсиз дея олмайман.