Италиялик трансфер инсайдери Фабрицио Романо маълум қилишича, Бельгиянинг «Антверпен» клуби «Барселона» ҳимоячиси Альваро Кортес трансфери бўйича келишувга эришди.
Футболчи тўлиқ трансфер асосида Бельгия клубига ўтади. «Барселона» эса испаниялик ҳимоячининг келажаги устидан назоратни сақлаб қолиш учун келишувга кейинги сотувдан улуш олиш ва футболчини қайта сотиб олиш бандларини киритади.
Кортес мавсумолди йиғинларида яхши таассурот қолдирганига қарамай, асосий жамоада етарлича ўйин амалиётига эга бўлишига шубҳа пайдо бўлгач, клубни тарк этишга қарор қилди. Айни пайтда «Барселона» янги марказий ҳимоячи излашни давом эттирмоқда.
Кортеснинг кетиши каталонияликларнинг чап оёқли марказий ҳимоячи излаш жараёнини тезлаштириши мумкин. Хабарларга кўра, «РБ Лейпциг» футболчиси Кастелло Лукеба клубнинг асосий номзодларидан бири ҳисобланади.
