Соат сари яқинлашиб келаётган 2022 йилдан барчамизнинг умидимиз катта. Бугун Ўзбекистон МОҚ раҳбарияти Қўмита ходимларини кириб келаётган янги йил билан қутлади.

Учрашувда МОҚ раиси Рустам Шоабдураҳмонов ва унинг биринчи ўринбосари Равшан Ирматов, Қўмита Бош котиби Ойбек Касимов, МОҚ раиси ўринбосари Азизжон Камилов, Ўзбекистон спорт фахрийлари кенгаши раиси Баҳодир Махситов ҳамда барча ходимлар жам бўлишди. Рустам Шоабдураҳмонов ортда қолган 2021 йил якунларини сарҳисоб қилар экан, эришилган ютуқлар ва камчиликларни бирма-бир санаб, 2022 йил Янги Ўзбекистон учун спорт оламида унутилмас ғалабаларни тақдим қилиш йўлида астойдил меҳнат қилинишини таъкидлади.

Таъкидлаш жоиз, 2022 йил нуфузли комплекс мусобақалар ва йирик тадбирларга бой бўлади. Январь ойида Ўзбекистон Миллий Олимпия қўмитаси ўзининг юбилей 30 йиллигини қарши олса, йил давомида спортчиларимизни қишки Олимпия ўйинлари, ёзги Осиё ўйинлари, Жанг санъати ва ёпиқ иншоотлардаги Осиё ўйинлари, Ислом бирдамлиги ўйинлари, Бутунжаҳон Универсиадаси ва ёшлар Осиё ўйинлари каби нуфузли мусобақалар, шунингдек, Тошкентда илк бор ўтадиган дзюдо бўйича катталар ўртасидаги жаҳон чемпионати кутиб турибди. Учрашувда сўз олган Равшан Ирматов, Ойбек Касимов ва Азизжон Камилов мазкур мусобақаларга тайёрланиш йўлида барчага куч-қувват тилаб қолишди.

Шунингдек, Рустам Шоабдураҳмонов Туризм ва спорт вазирлиги, Олий спорт маҳорати мактаблари, федерация ва ассоциацияларимизни, спортчи ва мураббийларни кириб келаётган 2022 йил билан МОҚ номидан самимий табрик йўллади.