«Ювентус» бош мураббийи Массимилиано Аллегри Италия суперкубоги доирасида бўлиб ўтадиган «Интер»га қарши ўйин арафасида ўз фикрлари билан ўртоқлашди.

«Биз узатмалар беришда сифатлироқ ҳаракат қилишимиз ва хотиржамликни йўқотмаслигимиз зарур. Биз ҳимоядан ҳужумга ўтишда шошяпмиз, аслида бундай қилмаслигимиз керак. «Интер» – жисмоний жиҳатдан яхши тайёрланган жамоа. Эртага биз ҳар бир вазиятдан унумли фойдаланишимиз керак.

Бизга вақт керак. Боиси, тажриба ўйинлар орқали орттирилади. Топ-клуб бўлишни истасак, эртага ғалаба қозонишимиз шарт.

Бу ўйинда ҳар қандай натижа қайд этилиши мумкин, аммо чемпионатда кучли жамоа ғалаба қозонади. Аввал ўзимиздан юқорида бораётган жамоаларни қувиб етишимиз керак. Шундан сўнг кейинги мавсумда соврин учун кураша олишимиз мумкинлигига ишонч ҳосил қиламиз», – деди Аллегри.

 «Интер» – «Ювентус» учрашуви 12 январь куни Милан шаҳридаги «Сан-Сиро» стадионида бўлиб ўтади.