Гарринча ҳақида эшитгансиз, камида катталар гапириб берган, балки ўзингиз қизиқиб кўргандирсиз. Ўйинларини бевосита кузатганлар ҳам бордир обуначилар орасида, шундай бўлса сизга алоҳида ассалому алайкум, набиралар яхшими?

Хуллас, Гарринчани фантастик футболчи бўлганини биламиз. Битта нарса, уни доим футбол қироли Пеле билан бир даражада гапирилганига гувоҳмиз. Пеле, Гарринчалар даври дейилади. Пеле, Гарринчалар Бразилияси дейилади. Гарринчани устун қўядиганлар ҳам бор. Зўр эди, қанотдан қочарди, бир оёғи калтароқ эди, оқсоқланиб югурардию тўпни ҳеч ким олиб қўёлмасди, бошқача эди, дейишади катталар. Кино эсга тушди: “Сен ундан зўрсан, ҳаттоки чиройлисан, бўйингам баланд. Лекин Қурбон бошқачада”.

Шу футболчи ҳақида бир факт ўқиб қолдим. Гарринча — унинг лақаби экан. Асли исми Мануэл Франсиску дус Сантус бўлган. Болалигида кичик тропик қушчалар боққан, уларнинг чуғурлашига қизиқар, товушини ўхшатар экан. Севимли қуши “гарринча” деб номланарди. Ўшанда онаси унга - ўзингам гарринчага ўхшаб кетяпсан деган экан. Ўша-ўша 2 карра Жаҳон чемпиони, 1962 йилги Мундиалнинг энг яхши футболчиси ва тўпурари, Бразилия тарихидаги энг буюк футболчиларидан бири Гарринча дея юритиладиган бўлди. Мозийга ҳам қайтиб туриш хайрлидир.

Даврон Файзиев.