Garrincha haqida eshitgansiz, kamida kattalar gapirib bergan, balki o‘zingiz qiziqib ko‘rgandirsiz. O‘yinlarini bevosita kuzatganlar ham bordir obunachilar orasida, shunday bo‘lsa sizga alohida assalomu alaykum, nabiralar yaxshimi?

Xullas, Garrinchani fantastik futbolchi bo‘lganini bilamiz. Bitta narsa, uni doim futbol qiroli Pele bilan bir darajada gapirilganiga guvohmiz. Pele, Garrinchalar davri deyiladi. Pele, Garrinchalar Braziliyasi deyiladi. Garrinchani ustun qo‘yadiganlar ham bor. Zo‘r edi, qanotdan qochardi, bir oyog‘i kaltaroq edi, oqsoqlanib yugurardiyu to‘pni hech kim olib qo‘yolmasdi, boshqacha edi, deyishadi kattalar. Kino esga tushdi: “Sen undan zo‘rsan, hattoki chiroylisan, bo‘yingam baland. Lekin Qurbon boshqachada”.

Shu futbolchi haqida bir fakt o‘qib qoldim. Garrincha — uning laqabi ekan. Asli ismi Manuel Fransisku dus Santus bo‘lgan. Bolaligida kichik tropik qushchalar boqqan, ularning chug‘urlashiga qiziqar, tovushini o‘xshatar ekan. Sevimli qushi “garrincha” deb nomlanardi. O‘shanda onasi unga - o‘zingam garrinchaga o‘xshab ketyapsan degan ekan. O‘sha-o‘sha 2 karra Jahon chempioni, 1962 yilgi Mundialning eng yaxshi futbolchisi va to‘purari, Braziliya tarixidagi eng buyuk futbolchilaridan biri Garrincha deya yuritiladigan bo‘ldi. Moziyga ham qaytib turish xayrlidir.

Davron Fayziyev.