Кеча, 25 январь куни Африка Миллатлар кубоги 1/8 финал учрашувида Марокаш терма жамоаси Малави терма жамоаси билан учрашди. Ўйин Яунде (Камерун) шаҳридаги "Omnispors Ahmadu Aijo" стадионида бўлиб ўтди ва Марокаш жамоасининг 2:1 ҳисобидаги ғалабаси билан якунланди.
70-дақиқада марокашлик ҳимоячи Ашраф Ҳакими жарима зарбасини аниқ амалга ошириб, ғалаба тўпини киритди. Бунгача у Габон билан ўйинда стандартдан гол урганди. Малави билан ўйиндан сўнг "ПСЖ" футболчисидан Париж клубида жарима зарбаларини ҳам тепишини сўрашди.
"Бу қийин бўлади. Лекин мен Лео ва Неймар билан гаплашишга ҳаракат қиламан”, - дея табассум билан жавоб берди Ҳакими, Le Parisien нашрига.
Марокаш терма жамоаси Африка Миллатлар кубоги чорак финалида бугун, 26 январь куни ўз учрашувини ўтказадиган Кот-д'Ивуар - Миср жуфтлиги ғолиби билан ўйнайди.
