Суперлига қуръаси олдидан "Қизилқум", "Қўқон-1912", "Олимпик", "Нефтчи" ва "Сурхон" мавсумнинг қатор турларини ўз аренасида ўтказа олмайдиган бўлади. Айрим кишилар мазкур ҳолатни турлича талқин қилаётганидан келиб чиқиб, масалага аниқлик киритиб ўтамиз.

Биз клубларга 1,5 йилдан буён қўйиб келинаётган талаб бўйича иш кўрмоқдамиз. Шу асосда прожекторларини белгиланган меъёрга олиб келмагани учун икки клубга уй учрашувларини ўтказиш бўйича тақиқ қўйилган.

"Қўқон-1912" бу борада аллақачон иш бошлаган. Катта эҳтимол билан апрель ойи ўрталарига келиб жамоа ўз ўйингоҳига қайтиши мумкин. Ҳаммаси иш қачон ҳал этилишига боғлиқ.

"Сурхон" билан боғлиқ ҳолат ижобий бартараф этилса, янги инвесторлар клуб стадионини қайта таъмирдан чиқаришни режалаштирган.

"Қизилқум"да ўзгаришлар катта. Навоий кон-металлургия комбинати жамоа учрашувларини ўтказувчи стадионни яхши кўринишга келтиришни мақсад қилган.  

"Нефтчи" стадион майсасини яхшилаш ишларини аллақачон бошлаб юборган. Биз таҳминан сентябрь ойларига бориб Истиқлол стадиони газони Навбаҳор стадиони каби бўлганини кўришимиз катта эҳтимол.

"Олимпик"да ҳам шундай вазият. Жар стадиони майсасини алмаштириш, прожекторларини яхшилаш ишлари давом этмоқда.

Кўриб турганингиздек, биз икки қадам олдинга юриш учун, бир қадам ортга ташлашимиз керак. Муҳими, ҳаммаси яхшиликка. Стадионлар бўйича янги низомни март-апрель ойларига тайёр қилсак, 2023 йилги мавсумда яна бошқа стадионлар майсаси ҳам яхшилана боради. Шунинг учун ҳам бизга ҳозирги принциплар керак.