Superliga qur’asi oldidan "Qizilqum", "Qo‘qon-1912", "Olimpik", "Neftchi" va "Surxon" mavsumning qator turlarini o‘z arenasida o‘tkaza olmaydigan bo‘ladi. Ayrim kishilar mazkur holatni turlicha talqin qilayotganidan kelib chiqib, masalaga aniqlik kiritib o‘tamiz.

Biz klublarga 1,5 yildan buyon qo‘yib kelinayotgan talab bo‘yicha ish ko‘rmoqdamiz. Shu asosda projektorlarini belgilangan me’yorga olib kelmagani uchun ikki klubga uy uchrashuvlarini o‘tkazish bo‘yicha taqiq qo‘yilgan.

"Qo‘qon-1912" bu borada allaqachon ish boshlagan. Katta ehtimol bilan aprel oyi o‘rtalariga kelib jamoa o‘z o‘yingohiga qaytishi mumkin. Hammasi ish qachon hal etilishiga bog‘liq.

"Surxon" bilan bog‘liq holat ijobiy bartaraf etilsa, yangi investorlar klub stadionini qayta ta’mirdan chiqarishni rejalashtirgan.

"Qizilqum"da o‘zgarishlar katta. Navoiy kon-metallurgiya kombinati jamoa uchrashuvlarini o‘tkazuvchi stadionni yaxshi ko‘rinishga keltirishni maqsad qilgan.  

"Neftchi" stadion maysasini yaxshilash ishlarini allaqachon boshlab yuborgan. Biz tahminan sentyabr oylariga borib Istiqlol stadioni gazoni Navbahor stadioni kabi bo‘lganini ko‘rishimiz katta ehtimol.

"Olimpik"da ham shunday vaziyat. Jar stadioni maysasini almashtirish, projektorlarini yaxshilash ishlari davom etmoqda.

Ko‘rib turganingizdek, biz ikki qadam oldinga yurish uchun, bir qadam ortga tashlashimiz kerak. Muhimi, hammasi yaxshilikka. Stadionlar bo‘yicha yangi nizomni mart-aprel oylariga tayyor qilsak, 2023 yilgi mavsumda yana boshqa stadionlar maysasi ham yaxshilana boradi. Shuning uchun ham bizga hozirgi prinsiplar kerak.