Жорий йилда юртимиз майдонларида бўлиб ўтадиган U23 Осиё кубоги ўйинларига қизғин тайёргарлик ишлари давом этмоқда. Хусусан, ЎФА ишчи гуруҳи томонидан ўйинлар ва машғулотлар бўлиб ўтадиган ҳудудлар ҳамда у ердаги мавжуд шароитлар ўрганилиб, ОФК стандартига мос келишини таъминлаш бўйича саъй-ҳаракатлар олиб бориляпти.

Шу кунларда чемпионат ўтказишга масъул бўлган Осиё футбол конфедерацияси делегацияси мамлакатимизда бўлиб турибди. Бугун пойтахтимиздаги «Бунёдкор» стадионида ОФК ва ЎФА мутахассислари иштирокида U23 тайёргарлик ишларига бағишланган учрашув бўлиб ўтди. Дастлаб ОФК вакиллари Ўзбекистоннинг эпидемиологик мураккаб вазиятда ушбу турнирга мезбонлик қилаётгани борасида миннатдорчилик билдирдилар. Ўз ўрнида, ЎФА биринчи вице-президенти Равшан Эрматов Ўзбекистон сўнгги йилларда бир қанча қитъа мусобақалари, хусусан — аёллар ўртасидаги Осиё кубоги ва айнан U23 Осиё кубогининг саралаш баҳсларини ўтказиб, катта тажриба тўплагани ва ОФК томонидан билдирилаётган ишончдан мамнун эканлигини билдирди. Бўлажак йирик турнирни ҳам муваффақиятли ўтказиш борасида барча ишлар ташкил этилишини қўшимча қилди.

Шундан кейин ОФК делегатлари «Бунёдкор» стадиони, кийим алмаштириш хонаси ва машғулот майдонларини кўздан кечиришди. Режага мувофиқ, делегатлар Қашқадарё вилоятига ташриф буюриши кутилмоқда.