Joriy yilda yurtimiz maydonlarida bo‘lib o‘tadigan U23 Osiyo kubogi o‘yinlariga qizg‘in tayyorgarlik ishlari davom etmoqda. Xususan, O‘FA ishchi guruhi tomonidan o‘yinlar va mashg‘ulotlar bo‘lib o‘tadigan hududlar hamda u yerdagi mavjud sharoitlar o‘rganilib, OFK standartiga mos kelishini ta’minlash bo‘yicha sa’y-harakatlar olib borilyapti.

Shu kunlarda chempionat o‘tkazishga mas’ul bo‘lgan Osiyo futbol konfederasiyasi delegasiyasi mamlakatimizda bo‘lib turibdi. Bugun poytaxtimizdagi «Bunyodkor» stadionida OFK va O‘FA mutaxassislari ishtirokida U23 tayyorgarlik ishlariga bag‘ishlangan uchrashuv bo‘lib o‘tdi. Dastlab OFK vakillari O‘zbekistonning epidemiologik murakkab vaziyatda ushbu turnirga mezbonlik qilayotgani borasida minnatdorchilik bildirdilar. O‘z o‘rnida, O‘FA birinchi vise-prezidenti Ravshan Ermatov O‘zbekiston so‘nggi yillarda bir qancha qit’a musobaqalari, xususan — ayollar o‘rtasidagi Osiyo kubogi va aynan U23 Osiyo kubogining saralash bahslarini o‘tkazib, katta tajriba to‘plagani va OFK tomonidan bildirilayotgan ishonchdan mamnun ekanligini bildirdi. Bo‘lajak yirik turnirni ham muvaffaqiyatli o‘tkazish borasida barcha ishlar tashkil etilishini qo‘shimcha qildi.

Shundan keyin OFK delegatlari «Bunyodkor» stadioni, kiyim almashtirish xonasi va mashg‘ulot maydonlarini ko‘zdan kechirishdi. Rejaga muvofiq, delegatlar Qashqadaryo viloyatiga tashrif buyurishi kutilmoqda.