Вадим Абрамов мураббийлигидаги Ўзбекистон миллий терма жамоаси 3 июнь куни ЖЧ-2014 сўнгги саралаш босқичи доирасида Эрон миллий терма жамоасини қабул қилади. Ўзбекистон футбол федерацияси мазкур саралаш босқичида мамлакат бош жамоаси уй ўйинларини ўтказадиган стадион сифатида «Пахтакор» стадионини ОФК мусобақалар бўлимида рўйхатдан ўтказди.
Маълумот ўрнида қайд этиш керак, Ўзбекистон миллий терма жамоаси Эронга қарши ўйин олдидан 22 май куни пойтахт Тошкентда йиғин бошлайди. 27 май куни Уммон миллий терма жамоасига қарши ўртоқлик ўйини ўтказиш режалаштирилганди. Бироқ Уммон тайёргарлик режасига ўзгартириш киритгани сабаб, мазкур ўртоқлик ўйини бекор қилинди. Айни пайтда Ўзбекистон футбол федерацияси 27 май кунга рақиб изламоқда. Ўйин Тошкентда ўтиши катта эҳтимол.
Ўзбекистоннинг 3 июнь кунги рақиби Эрон 17 апрель куни БАА миллий терма жамоасига қарши кураш олиб боради. Шунингдек эронликлар Япония футбол ассоциацияси билан ҳам оғзаки келишувга эришганликлари борасида маълум қилишган.
